पालघर : बाईकवरुन जात असताना अचानक रस्त्यावरील वीज खांब पडल्यानं दुचाकीस्वार गंभीर जखमी झाला आहे . ही दुर्घटना पालघर मधील बोईसर-नवापूर रोड येथील कोलवडे इथं घडली. या अपघातामध्ये जखमी झालेल्या तरुणाचं नाव योगेश पागधरे आहे. गंभीररीत्या जखमी झालेल्या योगेशवर सध्या रुग्णालयात उपचार सुरु आहेत. या घटनेमुळे महावितरण विभागाचा भोंगळ कारभार चव्हाट्यावर आला आहे. मुसळधार पावसात अनेकदा वीज खांब, झाडं उन्मळून पडण्याच्या घटना घडत असतात. त्या पार्श्वभूमीवर वेळोवेळी पाहणी आणि खबरदारी घेण्याची गरज व्यक्त केली जाते. बहुतांश वेळा अनुचित प्रकार टाळण्यासाठी रस्त्याच्या शेजारी असलेल्या झाडांची छाटणीही प्रशासनाकडून केली जाते. तसंच विजेच्या खांबाचीही वेळोवेळी पाहणी करणं गरजेचं असतं. मात्र योग्य ती खबरदारी वेळीच करण्यात न आल्यानं एक दुचाकीस्वार तरुण जायबंदी झाला आहे.
धावत्या बाईकवर वीज खांब पडल्यामुळे या मार्गावरील वाहतूकही विस्कळीत झाली होती. वीज खांब हटवेपर्यंत बोईसर-नवापूर रोडवरील वाहतूक खोळंबली होती. दरम्यान, वीज खांब पडल्याचं निदर्शनास आल्यानंतर अखेर महावितरणच्या कर्मचाऱ्यांनी घटनास्थळी धाव घेतली. विजेचा खांब पडल्यानं याचा परिणाम वीज वितरणावरही झाला आहे. सुदैवानं थोडक्यात तरुणाचा जीवा वाचला असला, तरी सध्या त्याच्यावर रुग्णालयात उपचार सुरु आहेत. मात्र या अपघातात दुचाकीचं मोठं नुकसान झालं आहे.
